一種情況　勞基梳爾會去沙特「養老」

曼聯左後衞勞基梳爾嘅紅魔鬼生涯進入倒數，根據英國《太陽報》爆料，呢位30歲英格蘭國腳對於去沙特阿拉伯搵食，持開放態度，如果新一季未能穩坐正選，就會喺明年1月冬季轉會市場重開後離隊，去中東掘金。

勞基梳爾近2季經常受傷，合共僅上陣27次，包括上季12次披甲，領隊魯賓艾摩廉已經為左閘位置補充新血，繼2月初簽入柏德列多古之後，巴拉圭新星迪亞高李安早前亦加盟，加上馬沙拉奧、達洛治亦有能力客串左後衞，勞基梳爾即使傷愈，但能否重獲正選，實屬疑問。

據悉勞基梳爾深知處境不妙，願意聽取沙特阿拉伯球會報價，如果條件優厚，加上失去曼聯主力位置，就會離開紅魔鬼。勞基梳爾現時仲有2年合約，估計身價為1,200萬歐元(約1.1億港元)，曼聯計劃出售多位球員，改善財政問題，賣走勞基梳爾並唔出奇。