最已陣？曼聯或叫停買前鋒計劃　信海倫成才

曼聯夏天花費1.3億鎊收購馬菲奧斯根夏同麥比奧莫，不過買箭頭行動就頻頻碰壁，兩大目標利安戴納同約基利斯都「名花有主」，依家進行嘅Plan C、D、E計劃亦傾唔掂數。據報「紅魔鬼」正考慮叫停買前鋒計劃，畀機會海倫再試1年，領隊魯賓艾摩廉信任佢可成大器。

英國《太陽報》報道，曼聯依家斟介尼高拉斯積遜(8,000萬鎊)、施斯高(7,000萬鎊)同奧尼屈堅斯(6,000萬鎊)，都因為費用太高而拉鋸，隨住買人遲遲未有進展，據報曼聯依家考慮擱置買前鋒，因為球隊仍有海倫同約舒亞舒克斯兩名箭頭，又有新星奧比馬田等住上位，人手仍然充足。

報道指領隊艾摩廉對海倫仍然抱有信心，認為根夏同麥比奧莫兩位創造型球員加盟，足夠令攻擊線產生變化，令身價達7,200萬鎊轉會費嘅海倫可以發揮所長。不過數據顯示，海倫只係喺加曼聯第1季入到10球，亦係佢生涯唯一一季聯賽入球達到雙位數字。