出動！利物浦群星行街購物食茶記

星期一已經來港集訓嘅利物浦，周五(25日)晨操之後，下午全隊放假，群星隨即出動，球迷只要運氣好，油尖旺一帶隨時都可以「野生捕獲」球星。

利物浦王牌前鋒穆罕默德沙拿獨自出行，換上背心長褲白波鞋，頭戴喼帽，就咁大搖大擺逛街，有途人上前同佢邊行邊自拍。

匈牙利外援蘇保斯拉爾，就同今夏由般尼茅夫新加盟嘅同胞米路斯卻基斯，一齊走入港式茶餐廳歎茶，感受香港風味，一行數人坐底冇耐，就吸引大批球迷注意，紛紛在餐廳外舉機影相圍觀。

另有球迷報告，一批利物浦球員去咗尖沙咀海運大廈商場行街購物，想知佢哋行縱，不妨留意球員社交平台，或到油尖旺一帶碰運氣。