紐卡素送助攻　曼城平價回購查科特

曼城即將落實回購22歲般尼門將占士查科特，以取代即將離隊嘅2號門將史提芬奧迪加，據報「藍月亮」僅支付2,700萬鎊轉會費畀般尼(約2.85億港元)，慳咗1,300萬鎊，主要係紐卡素送上「助攻」，曼城真係請飲茶。

占士查科特係曼城青訓出身，但從未上陣，出道後被外借到低組別球隊，2023年以1,400萬鎊轉會費加盟般尼，雖然加盟首季即護級失敗，但上季在英冠愈踢愈好，上陣45場只失16球，有29場不失球，協助球隊重返英超。

占士查科特今夏獲曼城及紐卡素垂青，曼城原本打算啟動回購條款，以4,000萬鎊回購(約4.22億港元)，但因為紐卡素送上報價，令曼城慳番一大筆。

原來曼城當日出售占士查科特時，除咗回購條款，仲有一項匹配條款，內容係只要有球隊提出報價，曼城就有權以相同價格優先回購，紐卡素報價為2,700萬鎊，結果曼城就以2,700萬鎊回購占士查科特，慳番一大筆。