約基利斯將着傳奇號碼　訪港上演「地標戰」

千呼再喚，阿仙奴收購士砵亭前鋒約基利斯，終於來到最後一步，根據英國各大傳媒報道，呢位27歲瑞典國腳已飛赴倫敦，將於周六(26日)稍後時間接受體測，如無意外雙方將簽約5年。據悉約基利斯將會繼承兵工廠史上首席射手亨利嘅14號球衣，並於下周四(31日)喺香港首次為阿仙奴上陣鬥熱刺。

阿仙奴力爭簽入約基利斯，已經蘊釀多時，最終以總值6,350萬鎊(約6.7億港元)轉會費令士砵亭放人，隨即飛去倫敦進行體測，「轉會權威」記者羅曼諾(Fabrizio Romano)上載約基利斯同經理人喺飛機上合照。英國《太陽報》指約基利斯只要完成體測，就會根據之前同兵工廠傾妥嘅協議，簽約5年，新一季將着14號球衣。

呢個冧巴對於兵工廠有特別意義，因為球隊史上最多入波嘅球員亨利就係着14號，總共上陣377場入228球。對上一位着阿仙奴14號嘅尼基迪亞上年夏天已轉投水晶宮，剛好騰出呢個傳奇號碼畀約基利斯，佢上季為士砵亭上陣52場入54球。

阿仙奴將於周日(27日)晚喺新加坡踢熱身賽對紐卡素，據了解約基利斯將飛往當地入場睇波，但由於時間緊迫，並唔會上陣，所以下周四(31日)喺香港啟德體育園主場館舉行嘅「北倫敦打吡」阿仙奴鬥熱刺，將成為約基利斯入「廠」第一擊。