球王唔係大晒　美職宣布判罰美斯停賽

國際邁亞密球星美斯因為拒絕參加周四(24日)美職明星賽，當時已傳出會遭處罰，美職賽會現時正式宣布判罰呢位38歲阿根廷球王，以及另1位缺席明星賽嘅國際邁亞密球員佐迪艾巴停賽1場，無緣周日(27日)早上美職主場對FC辛辛那提。

根據美職規定，除非球員有傷病，否則缺陣明星賽，會被罰停賽1場，曾效力洛杉磯銀河嘅伊巴謙莫域2018年就因為唔踢明星賽，需要坐1場「波監」。據悉美斯今次因為疲勞而放棄參賽，原本以為憑佢球王超然地位，可以獲賽會網開一面，但最終都係揸正來做，按例罰美斯同佐迪艾巴停賽1場。

國際邁亞密其中1位班主佐治馬斯表示，美斯非常不滿判決：「美斯好嬲好嬲，亦感到沮喪，希望唔會影響佢對美職嘅睇法，現時要團結一致，為球隊爭取佳績。」美國傳媒指美斯明知唔踢明星賽，會遭到處罰，仍然懶理，完全係咎由自取，但亦有聲音指明星賽屬於商業活動，美斯要集中力量踢好球會賽事，並冇做錯。

美斯將於年底約滿，早前傳出佢打算重返歐洲，為老友法比加斯執教嘅科木助陣，經過今次被罰停賽後，或進一步增加佢離隊可能性。