自己攞嚟　文迪輸波照開Party被炒

近年黑氣纏身嘅前曼城後衞班捷文文迪，愈撈愈霉，近日更被瑞士球隊蘇黎世請食無情雞，原因係佢無視球隊輸波照開Party。

31歲嘅班捷文文迪，喺今年2月先至加盟蘇黎世，但喺4月慘吞巴素利4蛋之後，佢被發現照去參加Party，對於咁樣輸波全無羞恥之心，令球隊高層震怒，認為佢咁樣對球迷係非常唔尊重，於是決定炒佢魷魚。

班捷文文迪曾為摩納哥同曼城勇奪法甲、英超冠軍，亦係2018年法國奪得世盃成員之一，可惜2020年捲入強姦案，儘管成功洗脫嫌疑，但遭曼城解僱，之後要重返法甲投弱旅羅連安特都踢唔掂，今年被放逐到蘇黎世，又搞單麻煩嘢，真係自己攞嚟。