當拿隆馬勢出「門」　引發曼市雙雄爭奪戰

法甲勁旅巴黎聖日耳門(PSG)同門將基安盧基當拿隆馬續約談判瀕臨破裂，根據法國《隊報》爆料，呢支歐聯冠軍已有換「門」大計，計劃簽入里爾門將盧卡斯捷華利亞，為當拿隆馬離隊做準備，據悉曼城及曼聯趁機搶人，爭奪呢位意大利國腳。

基安盧基當拿隆馬屬於PSG奪得上季法甲、法足盃及歐聯冠軍嘅功臣，亦協助球隊打入世冠盃決賽，呢位26歲鋼門只剩下1年合約，但仍未打算續約。PSG管理層擔心當拿隆馬仿傚基利安麥巴比上年自由身離隊，令球會蒙受重大收入損失，若然佢短期內再唔續約，就會趁夏天轉會市場出售佢，同時已有接替人選，收購23歲嘅里爾門將盧卡斯捷華利亞。

早前已傳出國際米蘭想簽入基安盧基當拿隆馬，英國《每日郵報》最新消息指「曼市雙雄」都加入爭奪，曼聯門將奧拿拿一直表現欠佳，加上早前受傷長抖，有必要簽入新門將，睇中當拿隆馬。

至於曼城亦面臨門將危機，因為艾達臣摩拉斯有意離隊，雖然會方回購22歲般尼門將占士查科特，但呢位小將恐怕難當大任，亦有興趣收購當拿隆馬。

根據《Transfermarkt》評估，基安盧基當拿隆馬剩下1年合約情況下，身價值4,000萬歐元(約3.7億港元)，「曼市雙雄」絕對買得起，現時主要睇呢位門神如何選擇。