【官宣】約基利斯加盟阿仙奴　解釋入「廠」原因

阿仙奴再有猛將加盟，正式宣布簽入士砵亭前鋒約基利斯，雙方簽約5年，成為今夏第6位新兵。呢位27歲瑞典國腳曾經獲曼聯等多間大球會垂青，佢表示之所以選擇兵工廠，全因同主帥阿迪達及體育總監貝達交談後，深信阿仙奴最適合自己。

據悉阿仙奴以總值6,350萬鎊(約6.7億港元)轉會費向士砵亭收購約基利斯，並向佢提供30萬鎊(約316萬港元)周薪，正如早前報道，呢位神鋒新一季着14號波衫，繼承兵工廠史上首席射手亨利衣缽。

約基利斯簽約後話：「我已經急不及待要着上阿仙奴球衣喺酋長球場入波，當我同阿迪達及貝達傾過後，覺得阿仙奴最適合我，再睇番佢哋踢嘅足球風格，以及上季歐聯同佢哋交手，我認為阿仙奴非常強大，所以選擇加盟兵工廠。」此外，約基利斯感謝經理人施天卡耶減收佣金，促成今次交易。

阿仙奴將於周日(27日)晚喺新加坡踢熱身賽對紐卡素，據了解約基利斯將飛往當地入場睇波，但由於時間緊迫，並唔會上陣，周四(31日)喺香港啟德體育園主場館舉行嘅「北倫敦打吡」阿仙奴鬥熱刺，將成為約基利斯入「廠」第一擊。