熱刺挖角失敗　基比斯韋特同森林續約

熱刺早前啟動諾定咸森林中場基比斯韋特「離隊條款」，斥資6,000萬鎊買斷呢位25歲英格蘭國腳，甚至已安排好體測，但森林指控呢支倫敦勁旅「非法斟介」，並威脅採取法律行動，結果令事件出現大逆轉，森林現時正式宣布同基比斯韋特續約至2028年，粉碎熱刺挖角美夢。

據悉諾定咸森林班主馬連拿基斯喺今次「反收購」行動發揮重要作用，近日親自飛去葡萄牙集訓基地，同基比斯韋特進行單對單會談，講解森林未來發展大計，以及基比斯韋特對於球隊嘅重要性，最終成功說服呢位猛將續約。

另有消息指馬連拿基斯出手闊綽，大幅增加基比斯韋特人工，由原本6萬鎊周薪提升至12萬鎊(約127萬港元)，佢更加冇理由離隊。

基比斯韋特上季上陣38場入7球及10次助攻，協助森林排英超第7位，相隔30年再次獲得歐洲賽入場券。不過，諾定咸森林喺周日(27日)凌晨熱身賽，以1比3不敵富咸，基比斯韋特後備上陣，並冇波入。