【有片】新羅馬王子!艾雲費格遜踢兩場入5球
去片睇艾雲費格遜入波
羅馬新簽前鋒艾雲費格遜又有佳作,繼上場熱身賽首次上陣,食出「大四喜」之後,周日(27日)凌晨第2次披甲又有波入,射入全場唯一入球,協助羅馬以1比0擊敗德乙球隊凱沙羅頓,踢兩場已入5球,獲球迷捧為「新羅馬王子」。
羅馬今季由前阿特蘭大主帥加斯柏連尼執教,大踢進攻足球,上場以9比0大勝丁組球隊Unipomezia,艾雲費格遜獨取4球。今仗開賽16分鐘,呢位20歲愛爾蘭國腳積極逼搶,成功搶走門將腳下球,射入空門打開紀錄,狀態非常勇猛,相信新一季可以穩坐正選位置。
羅馬早前以先借後買方式向白禮頓簽入艾雲費格遜,先借用1季,明夏有權以3,200萬鎊(約3.4億港元)買斷佢,但前提係艾雲費格遜新一季最少要創造30個入波(入球及助攻),羅馬先至會啟動買斷條款,難怪佢咁搏命。