馬古尼接班人　曼聯想簽挪威巨人中堅

曼聯近年積極搜羅潛力新星，根據英國《太陽報》爆料，紅魔鬼球探早前入場睇挪超白蘭恩主場對維京，主要目的觀察白蘭恩中堅希蘭表現，打算簽入呢位身高1米96嘅20歲中堅，作為哈利馬古尼接班人。

希蘭2年前升上白蘭恩一隊後，表現大獲好評，更加被睇好可以成為挪威史上最佳中堅，白蘭恩教練費爾阿歷山大臣將希蘭拎來同曼城中場洛迪卡斯簡迪相提並論，認為佢將來可以同呢位西班牙國腳一樣，奪得金球獎，已經吸引曼聯、拜仁慕尼黑、利華古遜、多蒙特等球會關注。

曼聯領隊魯賓艾摩廉考慮到中堅哈利馬古尼已經32歲，加上只剩下1年合約，有需要簽入年輕中堅，為球隊未來人腳做準備，希蘭潛力優厚，屬於合適人選。不過，曼聯要面對各大豪門競爭，要簽入希蘭並非易事。