曼城希望回購高爾彭馬　車路士叫價23億

曼城2年前將高爾彭馬賣畀車路士，當時已有評論指係最愚蠢交易，據報曼城現希望回購該英格蘭中場，向車路士報價1.47億鎊(約15.5億港元)，車路士斷然拒絕，並還價破世界紀錄嘅2.18億鎊(約23億港元)先有得傾。

西班牙傳媒報道，車路士並未將高爾彭馬定為非賣品，佢合約簽到2033年6月，明言當報價達到2.18億鎊，先會考慮談判，如果交易成事，將會打破2017年由尼馬保持嘅2.22億歐元轉會費世界紀錄。

曼城今夏重建陣容，奇雲迪布尼離隊影響最大，中場簽入雷恩達斯及卓基，惟效果有限，曼城亦樂意回購昔日青訓產品，例如最近由般尼回購門將占士查科特，不過想回購高爾彭馬，難度非常高。

高爾彭馬2年前由曼城轉投車路士，轉會費總值4,250萬鎊，被評為超值收購，高爾彭馬成為車路士谷底反彈嘅關鍵人物，上季重奪歐聯入場券，並係連奪歐協聯同世冠盃嘅主要功臣，反觀曼城開始走下坡，上季「四大皆空」，當日賣走高爾彭馬，真係後悔莫及。