皇馬陰招重施故技　轉會窗關閉前報價干拿迪

皇馬今夏免費簽入阿歷山大阿諾特，令利物浦人財兩失，據報皇馬打算重施故技，在夏季轉會窗關閉前幾日送出報價，主要目的係向球員表態，出年夏天可以免費羅致。

法國傳媒報道，皇馬將於夏季轉會窗最後幾日送出干拿迪報價，逼使利物浦作出決定，如果利物浦拒絕放人，等到明年夏天約滿後，皇馬就可以免費得到干拿迪。

皇馬去年夏天就係用同樣手法，今夏成功免費簽入阿歷山大阿諾特，雖然阿諾特事件後，利物浦已經高度警惕，但仍然無法阻止事件再度發生。

利物浦希望干拿迪續約留隊，打算開出重量級合約，並將轉會費定為5,000萬歐元(約4.6億港元)，不過最重要都係球員意向，事關干拿迪已表態，如果離開利物浦，皇馬係佢唯一選擇，利物浦想留住呢位法國國腳並唔容易。