英格蘭再演絕地反勝 贏西班牙衞冕女子歐國盃
英格蘭女足再演勝利大逃亡!周一(28日)凌晨女子歐國盃決賽,英格蘭喺先落後情況下,憑互射12碼擊敗世盃冠軍西班牙女足,成功衞冕。人氣球星基莉繼上屆決賽絕殺捧盃後,今場再交救命助攻兼入致勝12碼,被視為今年英國體壇風雲人物大熱。
2年前世盃決賽,英格蘭不敵西班牙屈居亞軍,今次再喺決賽碰頭又係西班牙領先,效力阿仙奴女足嘅卡丹堤25分鐘頂入;英格蘭完半場前有蘿倫占士傷出,「超級後備」基莉入替成為轉捩點,佢57分鐘助攻阿仙奴隊友阿歷西亞蘿素入波,兩隊激戰120分鐘打和1比1。
互射12碼階段,英格蘭先有貝芙美特射失,但西班牙喺第2至第4輪連續3輪宴客,即使英格蘭隊長莉亞威廉臣喺第4輪同樣射失,但負責決定性第5射嘅基莉成功射入,助英格蘭12碼射贏3比1,冧莊冠軍。英格蘭今屆3場淘汰賽,合共只領先過4分鐘32秒,8強互射12碼淘汰瑞典、4強靠基莉喺加時119分鐘絕殺,相當驚險。
27歲嘅基莉3年前喺女子歐國盃決賽,加時入致勝球2比1贏德國女足奪冠,今屆再成為捧盃功臣,佢賽後激動表示:「我為球隊感到光榮、為自己係英格蘭人光榮。射12碼我好冷靜,我知自己一定射入,希望全國人都支持我哋,呢班女仔值得得到大家支持。」
經過今場決賽後,博彩公司Coral已將基莉列為今年英國年度「體壇風雲人物」大熱門,英國王儲威廉同女兒夏洛特公主都有入場打氣,威廉王子賽後亦同夏洛特喺社交網聯合表示:「好精彩嘅比賽!英格蘭女足係歐洲冠軍,我哋以你哋為榮,好好享受呢個時刻!」