巾幗不讓鬚眉!英格蘭女足市場價值暴升
英格蘭女足再度揚威女子歐國盃後,一眾球星身價水漲船高,有體育財經專家表示,英格蘭女將未來幾年場外收入將暴增50%, 而且可以進入男足球員開拓唔到嘅市場,一個網上產品宣傳貼文就值6萬鎊!
英格蘭近年喺國際賽大放異彩,基莉、邦朗絲、貝芙美特等球星早成贊助商寵兒,隊長莉亞威廉臣就係Gucci、Nike、Pepsi等代言,贊助收入達400萬鎊、邦朗絲亦有Spotify、Visa等贊助,收入高達350萬鎊,基莉、蘿倫占士同阿歷西亞蘿素等都有過100萬鎊贊助收入。
媒體同公共關係公司總裁禮特表示:「女足有唔同觀眾層面,而且比男足更廣泛,佢哋可以打入女性產品市場,而且比男足更少負面新聞,贊助商自然更受落,同埋肯開更長合約。未來1至2年,我相信女足贊助合約會升20%至30%,過多幾年會突破50%,一個社交網廣告貼文就有2萬鎊至6萬鎊!」