約基利斯香港站首演？阿迪達咁樣講

阿仙奴落實用6,350萬鎊收購約基利斯後，呢位瑞典神鋒周日(27日)已經喺新加坡同隊友、球迷見面，「兵工廠」周四(31日)喺香港站對熱刺，唔少球迷期待佢會處子上陣，不過領隊阿迪達指約基利斯久未練習，落場要等待軍醫判斷，但會盡可能安排佢上陣。

對上兩季喪入102球嘅約基利斯，喺上場對紐卡素前正式亮相，同隊友逐一擁抱兼接受球迷歡迎，對於喺香港站對熱刺首演機會，阿迪達表示：「佢自從喺士砵亭最後一戰捧盃後，一直冇正式練習過，我哋要幫佢評估，佢喺體測表現良好，但要達比賽狀態亦好重要。我哋想佢盡早上陣，一定唔會勒住佢，醫療團隊會話我知得唔得。」

約基利斯喺新加坡亮相：https://x.com/i/status/1949438346788544812　

另一位有機會喺香港首演嘅球員，係西班牙中堅基斯甸摩斯基拿，雖然佢比約基利斯更早歸隊，但由於佢夏天代表西班牙U21踢歐國盃，所以較遲開操，加上期間經歷轉會，狀態仍有待提升，所以對紐卡素一仗未獲安排上陣。