愛的力量！基莉走出谷底苦盡「金」來

能夠喺國際大賽決賽做贏波英雄，對任何球員嚟講都係難能可貴，英格蘭女足前鋒基莉3年前做到，估唔到今屆女子歐國盃決賽再做多次！過去12個月基莉歷遍人生過山車，由結婚到冇波踢、轉會到歐聯冠軍，愛的力量就係基莉走出谷底嘅最大動力。

基莉上季效力曼城女足，因合約問題被放入雪櫃，頭4個月只係踢過1場波，唔少球迷都擔心佢會缺席歐國盃。今年1月基莉以借用身份加盟阿仙奴女足，猛虎出柙即協助球隊贏得歐聯冠軍，並且正式簽約成為阿仙奴一員。

今屆基莉只能擔任後備殺手，不過佢每次上陣都起關鍵作用，8強對瑞典女足後備上陣製造2球，幫英格蘭由落後0比2追番2比2，最後佢喺互射12碼亦有入波，帶領英格蘭晉級。4強對意利女足，基莉後備上陣，加時射12碼被撲出，好在佢反應快補中，成功絕殺入決賽。

今場決賽射入致勝12碼後，基莉豪言：「我一屆賽事唔會射失2次12碼！」基莉對自己射術充滿信心，或來自家人嘅力量，原來基莉一直配戴特製護脛，上面印上1年前同丈夫嘅結婚照，以及兩隻愛犬嘅漫畫風圖案。

基莉同老公史葛摩亞5年前喺愛華頓認識，當時史葛摩亞係球場管理員，老公依家已經去咗一間高爾夫球會做場地管理，作風非常低調，甘願做「女主角」基莉背後嘅男人。基莉亦表示丈夫一直以來嘅支持，係佢克服所有難關嘅最大力量。