「12碼貓紙」貼手臂　英格蘭斜視門神吐氣揚眉

英格蘭女足喺女子歐國盃成功衞冕，8強同決賽都要鬥到互射12碼先贏，門將漢娜咸頓自然係大功臣。呢位天生患有斜視嘅門將，細細個就做過多次眼部手術，一度被指冇機會做職業球員，最終憑努力同天份證明自己。

漢娜咸頓喺決賽屢救險球，更撲出卡丹堤同邦瑪迪嘅12碼，鏡頭影到佢事前做足功課，預備好有對手每個球員12碼特性嘅「貓紙」，而且貼喺手臂上用長衫遮住，既方便又唔使驚資料外洩。當基莉主射決定性12碼，漢娜咸頓更擰轉面唔敢睇，佢賽後表示：「我當時背轉望住球迷，射門後我問球迷結果係點，佢哋只係不斷狂叫，我都唔知點......直到見到基莉狂奔，我知道我哋贏咗！」

24歲嘅漢娜咸頓天生患有斜視，3歲前已經做過3次手術，可惜未能改善，但無阻佢繼續足球之路。到11歲，漢娜咸頓又發現有「深度知覺」問題，影響佢判斷物體嘅遠近同空間關係，醫生話佢做唔到職業足球員，更遑論要做守門員。結果漢娜咸頓永不放棄，呢個決賽MVP獎項就證明佢嘅努力並冇白費。