得償所願　迪亞斯投拜仁加薪5倍

魚唔過塘唔肥，在利物浦只獲低薪嘅路易斯迪亞斯，亞洲集訓期間獲放人轉投拜仁慕尼黑，據報迪亞斯今次轉會獲大幅加薪，由原本年薪僅得270萬歐元，暴升至1,400萬歐元(約2,470萬升至1.28億港元)，升幅超過5倍。

德國傳媒報道，拜仁慕尼黑出價總值7,500萬歐元(約6.8億港元)轉會費收購迪亞斯，被利物浦接納，迪亞斯將與拜仁簽約4年，將於周二在慕尼黑接受體檢，然後簽約。

2022年初加盟利物浦嘅迪亞斯一直係低薪球員，合約尚餘2年，早前多次續約談判都失敗，主因係利物浦都拒絕向佢大幅加薪，導致雙方關係緊張。

拜仁視迪亞斯為今夏首要目標，向呢位28歲翼鋒開出1,400萬歐元年薪，雖然唔算超高薪，但已比利物浦時高出超過5倍，利物浦亦收到一筆可觀轉會費，今次交易可謂3贏。