熱刺同意放走孫興民　亞洲行或成告別演出


孫興民已效力熱刺10年。

英超勁旅熱刺周一(28日)飛抵香港，準備周四(31日)同阿仙奴喺啟德體育園踢熱身賽。熱刺到埗後直接去紅磡嘅酒店，大批球迷已經喺酒店外迎接，當孫興民等球星現身即獲熱烈歡呼，不過消息指熱刺已為孫興民離隊「開綠燈」，FC洛杉磯目前正同老孫傾個人條件，亞洲行或成孫興民告別演出。

英國著名記者Ben Jacobs同Tom Bogert報道，美職球會FC洛杉磯收購孫興民已進行深入談判，熱刺已為呢合33歲前鋒轉會「開綠燈」，但最終決定權會喺孫興民手上，佢依家收到FC洛杉磯同沙特球會斟介，而佢目前傾向去美職發展。消息指如果孫興民決定離隊，熱刺願意將轉會費減至1,500萬鎊。

效力熱刺10年嘅孫興民，依家同球會只剩1年合約，目前以隊長身份領軍到訪香港同南韓。報道指任何轉會事宜，都會喺亞洲之旅完結後先至落實，因為熱刺同南韓嘅主辦單位有協議，保證孫興民一定會出席喺首爾對紐卡素嘅熱身賽，否則會大幅削減戲金。

熱刺周一到達香港後，大批球迷喺酒店外守候，當球員逐一落車即引嚟歡呼，新帥法蘭克同孫興民特別受到歡迎，而中場占士麥迪臣更拎住「私人枕頭」由上飛機拎到返酒店，落車後仲行去影番現場球迷，認真識做！熱刺今日(周二)會喺啟德體育園主場館進行公開操練。