愛華頓秘密「賣女」　籌彈藥斟基亞利殊

英國《泰晤士報》報道，英超球會愛華頓近期秘密「賣女」，將愛華頓女足賣畀一間叫Roundhouse嘅公司，而呢間公司控制人，正正就係美國班主佛烈金旗下另一公司，「左手交右手」為愛華頓盤數進帳6,000萬鎊，為引入曼城球星基亞利殊計劃再添銀彈。

為符合英超賽會嘅「盈利及可持續發展條例」，車路士同阿士東維拉先後都透過「賣女足畀自己」嚟整靚盤數，英超目前冇規例禁止球會行呢個灰色地帶，只要出售價格冇偏離市場價格就冇問題。愛華頓喺23/24球季曾因違反「盈利及可持續發展條例」，喺聯賽被扣8分。

愛華頓執靚個帳目後，轉會市場亦準備出招，目標係曼城中場基亞利殊，消息指愛華頓打算提出借用1季，除非基亞利殊願意大幅降低依家30萬鎊周薪，否則好難提出正式收購。傳聞拿玻里都對基亞利殊有興趣，不過呢位29歲中場早前榮升爸爸，佢同家人屬意留喺英格蘭。