入鄉隨俗　利物浦着「日本風」波衫鬥水手

利物浦將於周三(30日)熱身賽作客日職球隊橫濱水手，紅軍繼上場香港站着「中國風」球衣對AC米蘭之後，今仗亦會入鄉隨俗，着「日本風」特別版波衫比賽，預料將掀起搶購潮。

利物浦上場對A米，球衣號碼上有中國元素圖案，今次造訪日本，同當地出版社講談社合作設計，號碼及球員姓名採用書法藝術「書道」風格。講談社副社長神谷明子表示，書道並唔追求完美或對稱，而係從運動、平衡、空間及真誠之中尋找美好，整體而言以一種安靜力量，和諧說話，同團隊精神一樣，表達日本對利物浦嘅尊重。

利物浦今年4月已經同講談社合作推出一系列結合足球文化及日本漫畫藝術嘅產品，包括以漫畫風格展現利物浦史上主要偉大時刻，加上紅軍今次着「日本風」球衣比賽，相信可以帶動相關產品銷售，球場內外都可以大賺一筆。