多蒙特再翻嗒　查頓辛祖有望3度加盟

英格蘭球星查頓辛祖依家被曼聯放入雪櫃，遲遲未搵到新球會落班，不過據德國《天空體育》報道，德甲勁旅多蒙特正考慮「翻嗒」，查頓辛祖有望第3度加盟「蜜蜂軍團」。

查頓辛祖、阿歷真度加拿祖、安東尼馬菲奧斯等球星，依家被曼聯踢出集訓大軍，專心搵球會落班，其中查頓辛祖已經減價到1,600萬鎊就有交易，令前球會多蒙特都提起興趣。

德國《天空體育》消息指，多蒙特已聯絡查頓辛祖，睇佢有冇興趣重返德甲，而呢位25歲翼鋒亦知道多蒙特可以幫助佢重返高峰，事實上查頓辛祖出道以來，所有好表現都係喺多蒙特時期。

查頓辛祖喺2017年至21年間，喺多蒙特有50個入波同64次助攻，23/24球季以外借身份重返多蒙特，亦協助球隊打入歐聯決賽，如果今次轉會成事，將係查頓辛祖第3度加盟多蒙特。