一戰成名　「巴塞朗尼」IG粉絲急增19倍

巴塞隆拿上場熱身賽對神戶勝利船，19歲新兵巴迪治首次披甲，後備上陣立即入波，一戰成名，人氣急升，根據西班牙《世界體育報》統計，巴迪治加盟巴塞隆拿2星期，社交網帳戶Instagram(IG)「粉絲」急增近19倍，已經接近114萬。

巴迪治全名叫Roony Bardghji，加上2023年11月歐聯後備上陣，為哥本哈根射入絕殺1球，以4比3擊敗曼聯，因而有「瑞典朗尼」之稱。呢位瑞典U21小國腳上年因為十字韌帶受傷，缺陣長達11個月，加上就快約滿，巴塞只用200萬歐元(約1,820萬港元)就買到佢。

巴迪治加盟巴塞初時，前景被睇淡，輿論甚至認為佢只可以踢B隊，呢位翼鋒以行動證明自己有力喺一隊立足，上場熱身賽交足功課，協助球隊贏波之外，亦為自己贏得大量支持，IG「粉絲」由6萬急增至近114萬，並同隊友相處良好，獲讚有幽默感，加上巴迪治該仗身穿美斯同拉明耶馬之前着過嘅19號球衣，睇來上位在望。

相比之下，「星級」新兵拉舒福特演出黯然失色，上仗後備上陣，但踢咗32分鐘又被換走，狀態令人擔憂，新一季唔好話要同其他主力爭正選，甚至要爭贏巴迪治都困難。