華迪斯開齋　利物浦反勝橫濱水手

利物浦季前集訓日本站熱身賽，周三(30日)在海嘯警報下對橫濱水手，在先落後情況下連入3球，以3比1反勝對手，其中新加盟德國中場科利安華迪斯「開齋」入波，證明利物浦冇入錯貨。

利物浦今場除咗路易斯迪亞斯離隊轉投拜仁慕尼黑，祖高美斯受傷外，門將艾利臣比加亦因私人理由提前離隊返回巴西，要改由馬馬達舒維利把關，新兵伊基迪基、科利安華迪斯、米路斯卻基斯均正選披甲，上半場利物浦有加普攻門中柱，以及馬馬達舒維利飛身撲救等精彩鏡頭，半場互無紀錄。

下半場初段橫濱水手一度食詐胡，利物浦亦有達雲紐尼斯近門射斜，之後雙方開始搏拳，55分鐘植中朝日為水手先開紀錄，落後嘅利物浦狂攻，62分鐘科利安華迪斯為紅軍扳平1比1，68分鐘18歲小將尼奧尼飛腳撞入，利物浦反超前2比1，完場前3分鐘，16歲神童恩古莫亞跑足半個球場，憑住個人技術連過幾關一射入網，利物浦贏到3比1完場。