昔日曼聯天才冇波踢19個月　淪落英冠試腳

出身於曼聯青訓系統嘅班頓威廉斯，年少得志，曾被譽為紅魔鬼少數天才左後衞，但自上年6月約滿離隊後，一直冇班落，近日去到英冠球隊侯城試腳，相隔19個月先至重返球場。

班頓威廉斯喺2019/20年球季，以19歲之齡為曼聯一隊上陣，並迅速上位，該季36次披甲，並有1球進帳。不過，呢位英格蘭新星出道即高峰，其後表現無以為繼，曾被外借去諾域治、葉士域治。

班頓威廉斯球員生涯「致命傷」係私生活唔檢點，鍾意開快車，曾於2023年8月以時速160公里飆車，導致發生交通意外。雖然冇造成傷亡，但佢今年5月仍被判處14個月監禁，獲得緩刑2年。

班頓威廉斯近日去侯城試腳，對新特蘭熱身賽上陣15分鐘，成為佢自2023年12月為葉士域治對昆士柏流浪之後，首次參加比賽，至於能否獲得合約，仍然要睇佢未來試腳表現。