熱刺再有收穫　葡萄牙中場即將加盟

周四(31日)喺香港擊敗阿仙奴嘅熱刺，亞洲之行又傳出喜訊，據報佢哋已同拜仁慕尼黑達成協議，借用葡萄牙國腳中場祖奧包連夏，球隊實力進一步提升。

熱刺今個暑假簽入加納翼鋒古度斯後，領隊法蘭克表明仍會繼續增兵，30歲防中包連夏將成為下個加盟球員。轉會權威羅曼諾爆料：「包連夏加盟熱刺，Here we go！拜仁已開出綠燈，熱刺會借用1季，而且有權選擇用3,000萬歐元買斷(非強制性)。熱刺會負擔所有人工，包連夏會飛去英國做體測。」

包連夏喺2022年至24年效力富咸，被譽為英超最硬朗防守中場之一，不過上年轉會拜仁慕尼黑後淪為大後備，喺德甲只係踢過17場，就算依家仍有3年合約，拜仁仍然願意平價將佢放走。