施斯高首選加盟曼聯　海倫願留隊競爭

曼聯收購新前鋒計劃出現突破，據報RB萊比錫前鋒施斯高，屬意加盟曼聯多過去紐卡素，「紅魔鬼」即將正式報價。雖然曼聯決意買新前鋒，不過丹麥射手海倫就表明，佢嘅目標仍然係留隊競爭。

德國《天空體育》報道，施斯高對曼聯嘅斟介誠意非常欣賞，即使曼聯冇得踢歐洲賽，佢仍然屬於去「紅魔鬼」多於紐卡素。RB萊比錫同施斯高有君子協定，畀佢喺今個夏天轉會，所以將會降價至7,000萬歐元至8,000萬歐元，另再加500萬歐元至1,000萬歐元嘅獎金條款。

權威記者羅曼諾報道，曼聯同施斯高傾掂個人條件後，就會正式出價收購，而紐卡素亦願意開出同曼聯「睇齊」嘅條件，所以最後決定權會落喺施斯高手上。

對於施斯高有望加盟，曼聯前鋒海倫喺上場熱身賽後回應：「依家最重要係專注練習，未來嘅事睇下點，我嘅計劃好清晰，就係留隊爭正選。同其他球員競爭冇問題，只會令我更銳利，我完全準備好。」