愛華頓打聽久保建英價錢　勢破亞洲紀錄

愛華頓除咗想簽基亞利殊，據報佢哋亦睇中久保建英，正打聽該日本國腳前鋒轉會費價格，久保建英與皇家蘇斯達合約中包含6,000萬歐元(約5.4億港元)解約條款，如果以此價格轉會，將刷新亞洲球員身價紀錄。

西班牙傳媒報道，皇家蘇斯達並未收到關於久保建英報價，但該日本國腳不但係皇蘇進攻主力，喺拓展亞洲市場方面更有巨大作用，所以如果要皇蘇放人，必須有一份符合所有財務要求同吸引力嘅報價先得。

24歲嘅久保建英青年軍時代曾在巴塞隆拿受訓，出道初期效力FC東京，2019年加盟皇家馬德里，但從未為「銀河艦隊」上陣，期間外借到多支西甲球隊，2022年夏天正式轉會皇家蘇斯達至今，3季上陣137場入23球。

現時亞洲球員轉會費紀錄由拜仁慕尼黑南韓中堅金玟哉保持，佢喺2023年由拿玻里轉會拜仁，轉會費5,000萬歐元，如果久保建英觸發解約金6,000萬歐元轉會，就會打破亞洲球員紀錄。