坦哈格省靚招牌　利華古遜2連勝

前曼聯主帥坦哈格今夏成為利華古遜教練後，工作漸入佳境，剛於周六(2日)凌晨熱身賽，率領呢支德甲勁旅以2比1擊敗荷甲球隊幸運薛達，取得2連勝，由利物浦新加盟嘅中堅查洛爾昆沙頂入1球，坦哈格簽人眼光有料到。

坦哈格上月首度領軍比賽，利華古遜以1比5慘敗於法林明高U20腳下，遭輿論瘋狂恥笑，但呢位55歲荷蘭名帥知恥近乎勇，迅速協助球員提升狀態，第2場熱身賽以2比0擊敗德乙波琴。

今仗遇上幸運薛達，利華古遜亦佔盡上風，創造大量攻勢，並喺32分鐘由查洛爾昆沙頂入角球打開紀錄，亦係呢位22歲英格蘭新星加盟以來首次入波。

臨完上半場前，中場阿特利為利華古遜射成2比0，即使換邊之後被幸運薛達追番1球，但無阻球隊取得2連勝。坦哈格接受傳媒訪問時表示，需要再簽入4至5位球員，新一季先至有能力保住聯賽前4位。一直盛傳坦哈格有意簽入2位曼聯舊部安東尼馬菲奧斯、阿歷真度加拿祖。