一個動作！沙維西蒙斯同萊比錫決裂上「車」

近日盛傳車路士將收購2位荷蘭國腳祖利爾哈圖、沙維西蒙斯，前者上「車」已定局，沙維西蒙斯亦下決心加盟呢支英超豪門，最新發現呢位22歲中場已刪除社交網Instagram(IG)個人資料有關效力RB萊比錫內容，表明去意已決。

根據「轉會權威」記者羅曼諾(Fabrizio Romano)爆料，車路士同RB萊比錫正在討論收購沙維西蒙斯，呢位新星仲有2年合約在身，但已表明唔會續約，現時進一步刪除IG上RB萊比錫球員身份，似乎想向會方施壓批准佢離隊。德國傳媒指兩間球會已接近達成交易協議，有望以6,000萬鎊(約6.25億港元)轉會費成交。

沙維西蒙斯曾於巴塞隆拿及巴黎聖日耳門(PSG)青年軍受訓，升上PSG一隊後，一度被出售畀荷甲球隊燕豪芬，由於表現出色，PSG回購佢，但2年前外借去RB萊比錫。沙維西蒙斯上季上陣33場入11球及8次助攻，呢支德甲球隊今年1月以5,000萬歐元(約4.48億港元)買斷佢，如果最終轉售畀車路士，意味短短半年就賺咗一大筆。