被踢出大軍名單　29歲迪利阿里考慮掛靴

前熱刺中場迪利阿里近年足球事業每況愈下，今年1月加盟意甲球隊科木後，表現仍然冇起色，近日更加被教練法比加斯踢出季前集訓大軍名單，根據意大利《米蘭體育報》爆料，呢位29歲英格蘭球星考慮掛靴結束球員生涯。

迪利阿里3年前離開熱刺，轉投愛華頓，其後被外借去比錫達斯，由於長期狀態低迷，加上經常受傷，上陣時間非常少，佢今年1月加盟科木，簽約18個月，但僅於3月對AC米蘭上陣1次，而且只係踢咗10分鐘就食紅牌，被球證趕出場。

科木教練法比加斯都知道入錯貨，自此冇再派迪利阿里上陣，近期季前集訓亦冇佢份，明顯已經放棄呢位過氣球星。迪利阿里現時只能自己訓練，深知前途不妙，即使留隊亦冇運行，所以打算提早解約直接收山。