利物浦公布新一季冧巴　華迪斯獲王牌7號

利物浦正式公布新一季球衣贊助商，從NIKE回歸adidas，簽約10年，並宣布球員波衫號碼分配，近期着「臨時冧巴」踢熱身賽嘅新兵終於可以「正名」，中場科利安華迪斯獲得代表王牌嘅7號球衣，襯番佢超過1億鎊嘅昂貴身價，各位紅軍球迷可以安心印偶像球衣號碼。

利物浦之前考慮到人腳可能出現大變化，連帶新兵都未確定球衣號碼，包括科利安華迪斯近日着58號踢熱身賽。紅軍現時正式落實波衫號碼分配，最矚目一定係路易斯迪亞斯轉投拜仁慕尼黑之後，騰出7號球衣，結果由科利安華迪斯接過呢件戰衣，呢位德國國腳之前效力利華古遜身穿10號，依家着紅軍7號，延續王牌地位。

至於另1位貴價新兵前鋒伊基迪基獲得22號，謝利美費林邦着番效力利華古遜時期嘅30號，左後衞米路斯卻基斯着6號，門將馬馬達舒維利着25號。