伊沙克願復操　艾迪侯域發火：佢有資格練波？

紐卡素前鋒阿歷山大伊沙克嘅轉會鬧劇持續發酵，據報一心要去利物浦嘅佢，願意喺大軍由亞洲返英國後回歸操練，不過領隊艾迪侯域就發火，直指伊沙克態度惡劣，表明「想跟球隊練波都要有資格！」

利物浦早前提出收購後，伊沙克即提出離隊要求，更缺席紐卡素季前熱身同亞洲之旅，日前又喺未得球會同意外，返前球會皇家蘇斯達獨自練波，但消息指當紐卡素返英後，呢位前鋒願意歸隊復操。

紐卡素周日(3日)喺南韓同熱刺打和1比1後，艾迪侯域被問到伊沙克回歸一事，艾迪侯域表示：「你要有呢個資格先可以同球隊練波，我哋係堂堂紐卡素，球員有責任同球隊一齊、要有良好行為，呢啲都係考慮因素。我哋要確保所有球員都做到要求，先有同大隊練波嘅資格，冇人可以擺出一個差勁態態，然後當冇事發生咁練波。我當然想伊沙克喺度，但依家我唔知會點，球會有專人負責處理。」