熱刺噩耗！麥迪臣再重傷　最壞情況抖9個月

熱刺嘅亞洲之旅最後一站傳出噩耗，中場占士麥迪臣喺周六(3日)對紐卡素一戰重傷，喊住咁被擔架抬離球場。熱刺領隊法蘭克透露，麥迪臣膝傷係上季令佢提早收咧嘅相同位置，情況並不樂觀，報道指最壞情況可能要長抖9個月。

熱刺喺對紐卡素比賽尾段，麥迪臣同安東尼艾蘭加爭波後，冇身體接觸之下，表現痛楚呼叫軍醫，掩面倒地後情緒激動，最後喊住被抬離場，賽後亦見佢要拎住枴杖，領隊法蘭克表示：「足球生命有時好美麗，有時會好殘忍，麥迪臣依家嘅事就好殘忍，我唔知佢傷勢係點，但睇嚟情況好嚴重，個傷同佢之前膝傷係同一位置。」

麥迪臣喺5月初歐霸盃膝部受傷，錯過上季季尾賽事，著名醫生巴亞向《Tottenham Hotspur News》表示：「最壞情況係前十字韌帶撕裂，呢個情況至少抖9個月，要1年半時間先可以去返受傷前水平。最樂觀係撞傷式半月板受傷，只需幾個星期或1、2個月，不過根據麥迪臣嘅反應，呢個情況機會好低。」