【有片】肚腩仔冇問題 麥比奧莫首演獲讚
曼聯喺美國贏得英超夏季系列賽冠軍，周一(4日)對愛華頓嘅賽事，以7,100萬鎊轉會費加盟嘅麥比奧莫首度上陣，雖然佢冇入波亦冇助攻，而且仲見到有個「肚腩仔」，領隊魯賓艾摩廉承認麥比奧莫狀態未弗，但已經足夠交出亮麗表現。
麥比奧莫今場同馬菲奧斯根夏組雙箭頭，位置偏右嘅麥比奧莫積極回防，多次喺中後場拎波後突破重圍，幾次第一時間傳送亦製造到進攻機會，包括造就阿密特迪亞路博到12碼，亦有一次禁區頂射罰球被比克福特撲出，45分鐘上陣時間表現令人印象深刻。
艾摩廉賽後大讚麥比奧莫：「我覺得佢踢得好好，當然仲有好多地方可以改善，你感覺到佢嘅身體狀態並唔完美，呢個係好正常，但係佢嘅控球功架、轉身、同隊友嘅聯繫以及跑動，都係非常重要嘅事，佢將會成為曼聯非常重要嘅球員。」