利物浦最後閱兵　一日兩鬥畢爾包

利物浦完成「亞洲之旅」後，今晚返主場鬥西甲球隊畢爾包，仲安排「雙料娛樂」一日兩戰，兩軍同日連續兩次交鋒。「紅軍」主帥施洛要把握最後熱身賽機會，為下場8月10日晚對水晶宮嘅社區盾作最後檢閱。

「利畢之戰」頭場喺香港時間周二凌晨零時開波，3個鐘後踢埋第2場，球迷只需1張門票就可以睇晒兩場。由於一日應付兩戰，相信雙方會以兩套完全唔同嘅陣容交手，務求畀每位球員都有充裕時間爭取表現。

與此同時，利物浦由NIKE回歸Adidas，簽約10年，今場開始着「三間」新波衫，會方日前宣布波衫號碼分配，當中「天價新兵」科利安華迪斯接過路易斯迪亞斯離隊後嘅王牌7號，伊基迪基獲得22號，謝利美費林邦着番效力利華古遜時期嘅30號，左後衞米路斯卻基斯就着6號，門將馬馬達舒維利則成為「25號仔」，佢哋將首次喺晏菲路為「紅軍」比賽，相信會更加肉緊。

至於畢爾包開操後踢咗4場熱身賽，但近3場都輸波，主力人腳實力較弱之外，後備兵力更不及主隊，加上今次玩「車輪戰」，難免比較輸蝕。