利物浦豪華軍備大晒冷　AB隊一晚兩勝畢爾包


利物浦分兩隊比賽一樣冇問題。(Getty Images)

英超王者利物浦豪華軍備大晒冷！完成亞洲之旅後，利物浦周二(5日)凌晨返晏菲路進行最後閱兵，一晚內分成A、B兩隊連鬥西甲球會畢爾包。32名球員有份落場下，利物浦分別以4比1同3比2贏波，新兵伊基迪基表現大獲好評，強勢迎接周日(10日)社區盾到臨。

利物浦夏天花費超過2.6億鎊買人，陣容極度豪華，為準備社區盾同英超展開，佢哋安排一晚之內兩戰畢爾包。頭場「紅軍」先派出大量後備同青年軍，由達雲紐尼斯、阿歷斯麥亞里士打領軍，最終靠恩古莫亞、達雲紐尼斯、哈維艾利洛入波以及對手擺烏龍，輕鬆大勝4比1。

緊接第2場比賽，利物浦排出最強陣容，新兵伊基迪基、科利安華迪斯齊擔正。14分鐘伊基迪基爆落底線傳中，沙拿接應一針見血射入，但畢爾包29分鐘靠死球攻勢追平。下半場利物浦發力，加普喺15分鐘內入2球兼擺咗次烏龍，為主隊領先3比2；沙拿尾段12碼宴客，無阻利物浦贏3比2。

雖然有華基爾雲迪積克、干拿巴特利、艾利臣比加同祖高美斯4位主力缺陣，但利物浦今場仍有32個球員落場，領隊施洛就非常滿意：「喺呢兩場比賽我哋製造好多機會，入咗7球係好令人鼓舞，我最滿意球隊創造機會嘅能力，伊基迪基會係個好出色嘅球員。」

利物浦下場比賽喺周日嘅社區盾，將會喺溫布萊球場同水晶宮爭逐冠軍，之後就會喺英超開鑼戰對般尼茅夫。利物浦目前仍積極增兵，只要紐卡素願意放人，「紅軍」仍想用破英超紀錄嘅1.2億鎊收購瑞典前鋒阿歷山大伊沙克。