【有片】利物浦16歲神鋒橫空出世 車仔被打劫嬲爆
利物浦連串季前熱身賽，科利安華迪斯等貴價新兵當然係焦點，不過球迷最大嘅驚喜，就來自16歲天才前鋒恩古莫亞。呢位神童周二(5日)對畢爾包，由中場線拎波後狂爆到禁區頂射入，技驚四座，唔少球迷都話佢係「車路士放走第2個沙拿」。
今個月底先至17歲嘅恩古莫亞，上年4月由車路士爭議性加盟，今年1月英足盃更已為一隊首演。恩古莫亞喺季前熱身賽一直表現出色，對AC米蘭交出助攻、對橫濱水手又有入波，今場對畢爾包開波2分鐘，佢喺中場線搶到波後，狂推到禁區頂射入，藝高人膽大。
利物浦領隊施洛表示：「恩古莫亞喺季前每場比賽都展示出高超才華。」恩古莫亞8歲就加入車路士青年軍，上年被利物浦挖角後，車仔嬲到提出訴訟，最後只係獲賠幾十萬鎊「培育費」，據報車路士自此之後，已禁止利物浦球探進入車路士青訓基地。
車路士喺10年前放走穆罕默德沙拿，結果呢位埃及前鋒轉個頭就加盟利物浦，並成為英超史上最佳前鋒之一，唔少球迷都認為，恩古莫亞將會係車路士送畀利物浦第2份「禮物」。