車路士大清貨　賀爾將轉投愛華頓

車路士今夏大肆增兵之外，同時清走多位冗員，根據「轉會權威」記者羅曼諾(Fabrizio Romano)最新消息，呢支英超豪門已經同意將中場達斯貝利賀爾出售畀愛華頓，轉會費為2,500萬鎊(約2.6億港元)。

車路士上年夏天以3,000萬鎊向李斯特城收購達斯貝利賀爾，呢位26歲英格蘭球員上季各項賽事上陣36次，合共射入5球及3次助攻，但只有19次擔任正選，而且主要踢盃賽，英超僅13次披甲，已經唔屬於領隊馬利斯卡計劃之內，所以愛華頓提出收購後，車仔迅速答應，雙方達成協議，固定轉會費為2,500萬鎊，另有400萬鎊浮動轉會費。

據悉達斯貝利賀爾將於周二(5日)稍後時間進行體測，車路士今夏已經有超過10位球員離隊，但清貨行動仍未結束，下一位被出售球員好大機會係中場尼干古。