紐卡素加碼搶施斯高　曼聯亦出價爭人

紐卡素同曼聯進行嘅「施斯高爭奪戰」，「喜鵲」態度非常進取，據權威記者羅曼諾報道，紐卡素周二(5日)再加碼，向RB萊比錫提出總值9,000萬歐元收購，目前未有決定。曼聯方面亦正式出價爭人，等待施斯高表態。

紐卡素日前出價7,500萬歐元，外加500萬歐元獎金條款，結果被RB萊比錫一口拒絕。死心不惜嘅紐卡素周二決定加碼，將開價提高至8,000萬歐元加1,000萬歐元，RB萊比錫仍未作出回應，據報施斯高嘅個人決定會有重大影響。

羅曼諾之後再透露，曼聯已正式向RB萊比錫出價8,500萬歐元，但明顯低過紐卡素。22歲嘅施斯高係斯洛文尼亞國腳，上年先至同RB萊比錫續約到2029年，雖然佢同球會有君子協定可以喺夏天轉會，但RB萊比錫拒絕割價兜售。