防止皇馬挖角　曼城出隊內第2高薪綁實

曼城中場洛迪卡斯簡迪上季因為受傷缺陣大部分賽事，但仍然深得領隊哥迪奧拿信任，英國傳媒指「藍月亮」計劃提早同呢位29歲西班牙國腳續約，並會大幅加人工，令佢成為隊內第2高薪球員，防止皇馬挖角。

雖然洛迪卡斯簡迪仍有2年合約在身，但已經多次傳出皇馬準備簽入呢位中場猛將，曼城自然不敢怠慢，希望盡快同呢位「不敗之男」續約，令佢可以專心為球隊搏殺。

洛迪現時周薪為22萬鎊，僅排隊內第9位，甚至低過中堅史東斯，即使新加盟嘅中場雷恩達斯亦有23萬鎊周薪。最離譜係「玻璃腳」基亞利殊擁有30萬周薪，同貝拿度施華並列隊內第2高薪球員。因此，一般估計曼城向洛迪卡斯簡迪開出嘅新合約，周薪勢必超過30萬鎊，僅次於隊內「打工皇帝」艾寧夏蘭特嘅52.5萬鎊。

「轉會權威」記者羅曼諾(Fabrizio Romano)指曼城方面正起草新合約條款，爭取短期內同洛迪卡斯簡迪完成續約手續。