摩納哥中伏　普巴未踢已先缺陣3個月

法甲勁旅摩納哥6月底簽入自由身球星保羅普巴，以為執到寶，點知中伏，球會行政總裁堤亞高施古路表示，呢位32歲中場肯定缺陣新一季聯賽開鑼戰，並預計佢要等多3個月先至可以上陣。

保羅普巴同摩納哥簽約2年，球迷非常關注佢幾可以披甲，堤亞高施古路日前接受傳媒訪問時話：「普巴唔會踢8月16日晚首輪法甲對勒哈弗爾，我哋要以佢長期健康着想，並非考慮短期感情因素，估計佢要等多3個月，先至會重返球場。」

保羅普巴近年事業每況愈下，2022年同曼聯不歡而散，重投祖雲達斯後，表現一樣冇起色，經常受傷之餘，2023年8月一次例行藥檢，更加被發現服用禁藥，一度被罰停賽4年，上訴後減至18個月，今年3月刑滿解禁，但上年年尾已被祖記提早解約，直至今年6月底先至獲摩納哥簽入。

雖然保羅普巴並非有傷在身，但畢竟佢已經近2年冇踢過正式賽事，外界普遍認為佢需要時間操練重拾狀態，但估唔到要多3個月時間「備戰」。