迪基亞周六重返奧脫福　魔迷要「綁架」佢

曼聯將於周六(9日)晚主場出擊同費倫天拿踢熱身賽，昔日紅魔鬼鋼門迪基亞將首次重返奧脫福球場倒戈，唔少曼聯球迷事先揚言比賽之後，唔會畀呢位34歲西班牙球星離開，希望佢重投曼聯把關，取代奧拿拿。

迪基亞2023年夏天約滿離開效力12年嘅曼聯，「失業」1年先至獲費倫天拿簽入，並繼續有出色表現。曼聯今夏最後1場熱身賽主場對費倫天拿，迪基亞重返故地備受關注，佢喺社交網發文話：「曼聯之路，周六見。」引來大量紅魔鬼球迷留言，包括有人話：「比賽之後，我哋唔會畀你離開奧脫福，費倫天拿可以帶走奧拿拿。」另外有人話：「好開心可以再次睇你比賽，曼聯對待你太差。」

前曼聯主帥坦哈格2年前放棄迪基亞，堅持簽入奧拿拿，效果極差，近期多次傳出曼聯準備出售呢位喀麥隆國腳，簽入新門將。由於奧拿拿受傷長抖，周末冇得同迪基亞正面交鋒，避免出醜人前。