即插即用　熱刺急斟干拿加歷查救亡

熱刺中場占士麥迪臣早前熱身賽對紐卡素，整傷膝部後，面臨休戰9個月，領隊法蘭克計劃簽入替代人選，根據西班牙媒體《Fichajes》爆料，熱刺會方睇中馬德里體育會中場干拿加歷查，貪呢位25歲英格蘭國腳熟悉英超環境，可以即插即用。

干拿加歷查屬於車路士青訓產品，曾於2022至24年為車仔上陣95次入10球，並一度擔任隊長，但上年夏天被出售去馬體會。干拿加歷查未獲馬體會主帥施蒙尼重用，加上呢支西甲勁旅計劃收購新中場，唔排除賣走干拿加歷查籌集資金，急需用人嘅熱刺趁機提出斟介，願意以4,300萬鎊(約4.5億港元)轉會費簽入干拿加歷查，比馬體會上年買入價多900萬鎊，有望令對方放人。

事實上，熱刺方面早已有興趣簽入干拿加歷查，但上年被馬體會截胡，現時終於有機會得到呢位猛將。另外，熱刺落實向拜仁慕尼黑借用防守中場祖奧包連夏，借用費為700萬歐元，並需要負擔全額850萬歐元年薪，呢位30歲葡萄牙國腳立即有機會喺周五(8日)凌晨熱身賽倒戈鬥拜仁。