阿仙奴熱身賽2連敗　新兵亮相畀舊部搶風頭

阿仙奴周四(7日)凌晨喺季前熱身賽，主場2比3輸畀西甲球會維拉利爾，近期連輸2場。新兵約基利斯、馬度基等首次喺酋長球場亮相，不過風頭就畀「黃色潛艇」嘅前阿仙奴球員搶晒鏡。

阿仙奴喺亞洲之旅香港站輸畀熱刺後，今場返倫敦對維拉利爾繼續試陣，瑞典前鋒約基利斯首度擔正，但佢喺缺乏供應下表現平淡，反而客隊嘅效率更高，17分鐘由尼高拉斯比比門前「執雞」入波，呢位阿仙奴歷來最高轉會費球員，倒戈入波後拒絕慶祝，以示對舊球迷尊敬。

維拉利爾34分鐘由艾達艾揚射成2比0，阿仙奴2分鐘後靠基斯甸洛加特接應角球破蛋。維拉利爾68分鐘有另一前阿仙奴球員丹尼斯蘇亞雷斯交助攻，畀哥爾尼維特反擊入波射成3比1；阿仙奴之後有小將麥斯杜文博到12碼，馬田奧迪加特操刀追成2比3，可惜為時已晚。

阿仙奴領隊阿迪達賽後表示：「戰果令人失望，防守上有啲太天真，進攻效率亦肯定要提升，不過備戰上今場就好有用，好多球員都得到需要嘅磨練時間，到下個星期同開季會更加理想。」阿仙奴周日(10日)會喺酋長盃對畢爾包，下周英超開鑼戰就作客曼聯。