【有片】友賽踢到打大交 貝迪斯前鋒打錯自己友
周四(7日)凌晨季前熱身賽，意甲球會科木同西甲貝迪斯交鋒，呢場波踢到充滿火藥味，上半場尾聲更出現「打大交」場面，兩邊球員互相揮拳，貝迪斯前鋒古曹靴南迪斯更飛身施展右勾拳，點知打錯自己隊友，睇到球迷O晒嘴。
由法比加斯領軍嘅科木表現出色，上半場領先2比0，但喺完半場前出現大混亂，柏保路科奴斯(貝迪斯)同佩朗尼(科木)發生爭執，科奴斯率先出拳打人，佩朗尼亦揮拳還擊，兩隊球員隨即加入戰團，其中古曹靴南迪斯高速衝前，飛身施展右勾拳，但殺錯良民打中隊友拿坦。
最令人驚訝嘅係，球證最後向佩朗尼出示紅牌，但出第1拳嘅科奴斯以及古曹靴南迪斯就乜事都冇，貝迪斯嘅比利連走向同球證理論，愈講愈激烈下亦被趕出場，不過冇幾耐之後亦被取消。呢場友賽最終喺一片混亂下，由科木贏出3比2。