艾摩廉成立「領袖小組」　6人名單曝光

曼聯近年受到球員紀律問題困擾，領隊魯賓艾摩廉力圖撥亂反正，狠心將拉舒福特、阿歷真度加拿祖、安東尼馬菲奧斯同查頓辛祖4大麻煩友踢走。據報艾摩廉仲成立6人「領袖小組」，負責處理更衣室內大小問題，希望可以重整綱紀。

艾摩廉欽點嘅「領袖小組」，以隊長般奴費南迪斯為首，成員包括哈利馬古尼、利辛度馬天尼斯、達洛治、馬沙拉奧同湯希頓。其中馬沙拉奧上年由拜仁慕尼黑過檔，加盟曼聯未夠1年就入組，艾摩廉似乎對佢嘅領導才能充滿信心。

艾摩廉表示：「我哋依家有個領袖小組，唔單止般費，總共有6個人，佢哋要領導呢班球員。上季有好多事情都要我親自去處理，我同佢哋講，今季你哋要自己解決問題，你哋要負起呢個責任。呢個小組唔係睇年紀，馬沙拉奧入選係因為佢嘅性格，佢哋要負責令全隊保持一致。」