維拉轉會靜過圖書館　麥甘尼轟英超打壓

阿士東維拉近年成績起飛，今季雖然未能躋身歐聯，但都會出戰歐霸盃賽事，不過佢哋今個夏天轉會窗就靜過圖書館，隊長約翰麥甘尼承認維拉受到財政條例規限，未能大展拳腳，直指英超條例係打壓中小型球會。

維拉今夏免費簽入荷蘭小將列特文，以及引入比蘇治做後備門將，陣容同上季幾乎一樣，而且奧尼屈堅斯同達米安馬天尼斯都傳出可能離隊。據報維拉轉會「零」動作，係因為喺「盈利及可持續發展條例」面臨爆煲，所以只能忍手。

隊長約翰麥甘尼日前表示：「我哋目標係重返歐聯，但係人都知道，要同列強競爭就要增強實力，但有啲好唔公平嘅條例打壓我哋。維拉有願意花錢嘅班主，可惜佢被禁止咁做，好多中小型球會都一樣，我認為呢啲財政條例，只係保護住傳統Big6球隊。」